皇馬4大皆空 搵愛奴出氣

猪拉多纳

剛於歐聯出局、今季面臨四大皆空嘅皇家馬德里哀兵上陣作客鬥愛斯賓奴，憑過去10次對賽取得8勝2和嘅靚績，相信可以贏番場波，出一口烏氣，捧讓球客勝。

（now 633周一凌晨1時直播）

皇馬上周中喺歐聯4強被祖雲達斯踢出局，聯賽爭標形勢亦落後於巴塞，今季極有機會四大皆空，教練安察洛堤除咗面臨被炒危機，上輪對華倫西亞更因為被指侮辱球證罰停賽兩場，換句話講餘下兩輪聯賽都唔可以領軍。
C朗爭神射手安慰獎

皇馬成績唔好係不爭事實，唯一安慰係上場對祖記見到前鋒賓施馬復出而且狀態唔錯，比起用「小豌豆」查維亞靴南迪斯明顯更具威脅。基斯坦奴朗拿度依家喺射手榜領先美斯兩球，以佢一向唔服輸嘅性格，當然唔會甘心輸埋個神射手獎畀美斯，餘下比賽一定會繼續努力爭取士哥，希望攞番個安慰獎。

愛斯賓奴現排第9位，既冇降班威脅，爭踢歐洲賽又未輪到佢哋，餘下只屬例行公事。連盃賽在內，愛斯賓奴近10次對皇馬只得2和8負，包括近5次全敗，極有格食格味道，信皇馬可以踢番場爭氣波，捧讓球客勝。