兵工廠+1驅魔

猪拉多纳

力保三哥 阿四留番畀曼聯

英超「三哥戰」，曼聯主場迎戰阿仙奴，兩軍已經差唔多肯定取得歐聯席位，今場就要為第三名而戰，若然「紅魔鬼」爬過「兵工廠」頭做「三哥」，下季就可以直接殺入歐聯分組賽，唔使踢外圍賽，不過曼聯上場對住水晶宮都贏得勁險，今場想贏阿仙奴，真係難啲噃，受讓嘅阿仙奴值得捧場！

（now 621周日晚11時直播）

阿仙奴過去四季有三季係排第四位，上場又無啦啦輸畀史雲斯，同曼聯嘅分差收窄到得兩分，結果畀網民寸爆佢哋鍾意做「阿四」，領隊雲格今場賽前就講明要力保第三，唔想再踢歐聯外圍賽。其實「兵工廠」上場贏形勢輸波，對住一味玩防守嘅「天鵝」冇啖好食，不過今場對住肯定唔會玩死守嘅曼聯，差唔多可以夫添出擊嘅阿仙奴要入波冇難度吖，要保不敗亦唔係難事。
曼聯傷咗卡域克即散

嚟到季尾曼聯繼續受傷患困擾，副隊長卡域克因傷提早收咧，冇咗呢位中場大將，紅魔得勝率即刻大幅下跌，佢係喺四月主場擊敗曼城一戰傷出，之後曼聯隨即錄得三連敗兼零入球，雖然曼聯上場作客水晶宮終於成功止血，取得重要3分，不過成場波紅魔嘅表現認真唔掂，如果唔係門神迪基亞多次神救，呢3分肯定袋唔到落袋！

而隊長朗尼今場亦唔出得，紅魔冇晒正副隊長，今場又有乜本錢贏到「兵工廠」，唔通真係靠傷愈冇態嘅尹佩斯，或者係變咗病貓嘅「老虎」法卡奧咩？落後阿仙奴兩分嘅曼聯打多對方一場，一定要贏先有機搶做「三哥」，今場焗住要攻，「兵工廠」有望偷雞得手，受讓熱捧讓球客勝！