馬體會走晒樣 巴塞派奪標W

猪拉多纳

西甲盟主最快今晚出爐！上季巴塞隆拿喺魯營畀馬德里體育會逼和，親眼睇住對方做盟主。今晚風水輪流轉，「地上最強」如果作客砌低馬體會嘅話，就可以提前一周喺「床單兵團」地頭封王，以尼馬近期Fit到爆嘅狀態，相信走晒樣嘅馬體會絕對唔係巴塞手腳，一於捧2.72倍「讓球客勝」。

（now632台及TVB13周一凌晨1:00直播）
哨牙蘇拉傷上陣成疑

巴塞季尾愈戰愈勇，殺入歐聯同西班牙盃決賽，聯賽冠軍亦近在眼前，大有機會成為三冠王。周中巴塞作客拜仁場歐聯4強次回合大戰，主帥安歷基晨早收起蘇亞雷斯，美斯同尼馬下半場亦收油唔去，明顯為今仗做好部署。雖然話「哨牙蘇」左腳肌肉有傷，尋日先復操唔知踢唔踢得，但尼馬近期入波當食菜，最近7場波喪入9球，由佢夥拍美斯同柏度洛迪古斯攻堅，火力一樣信得過。
「床單兵團」唔夠揪 近3次交手輸晒

一向以防守耍家見稱嘅馬體會，今季防守力明顯唔及上季，要抵擋巴塞嘅進襲都咪話唔牙煙。呢支衞冕盟主由1月開始3鬥巴塞輸晒兼失咗7球，擺明唔係「地上最強」對手。況且馬體會近況麻麻，對上兩仗先後賽和畢爾包同利雲特等中游分子，前鋒文迪蘇傑陷入球荒，就算盛傳季尾過檔車路士嘅基沙文曉飛，睇怕都好難喺今季西甲只失咗19球嘅巴塞身上搵到食。
盤路解碼

巴塞今季「-1」盤路為14勝9和4負。
Data King：馬體會半場5連和

‧雙方今季3次交手，巴塞隆拿贏晒。

‧馬體會近6次喺卡達朗球場迎擊巴塞錄1勝2和3負。

‧「床單兵團」連開5口半場和。
乜都玩錦囊：捧巴塞波膽派2、3蛋

巴塞已經連續5場西甲保持清白之身，撞啱馬體會呢期火力跌Watt，基沙文亦有離心，睇怕今鋪連破蛋都有難度，波膽向0:2、0:3埋手。