車仔識做見好就收

猪拉多纳

西布朗向新科盟主致敬

今晚英超獨腳戲，「悶蛋大巴」車路士作客對上咗岸嘅西布朗，車仔今季由頭帶到落尾，奪冠係實至名歸，尤其已走下坡嘅34歲隊長泰利更鹹魚翻生，令車仔防線密不透風，西布朗賽前打算列隊歡迎呢支冠軍之師，似係未踢先怯，斯維認為車仔可小勝而回，客Ｗ穩開。

（now 621周二凌晨3時直播）

車仔自開咧後一直帶頭，以極度穩定嘅狀態重奪失落4季嘅聯賽錦標，另加一個英格蘭聯賽盃，盡顯王者風範。不過自從中場核心法比加斯下半季表現跌Watt後，「寸王」主帥莫連奴當機立斷改變戰術，季初踢到穿花蝴蝶嘅進攻組織煙消雲散，重拾穩守突擊，難怪球迷狂寸車仔沉到爆，但正所謂「贏波靠進攻，奪冠靠防守」，近16場聯賽只失9球，與頭20仗聯賽共失19粒，可謂差天共地，咁樣就成就咗車仔「雙料冠軍」。
泰利鹹魚翻生攻守俱備

當中不得不提車仔老臣泰利，呢位34歲隊長近年確實走下坡，喺前任領隊賓尼迪斯麾下更失去正選。不過自莫連奴上季回巢執教後，泰利逐漸重拾最佳狀態，不但喺佢領導下防線變番銅牆鐵壁，並屢次攻入關鍵入波，包括聯賽盃決賽對熱刺先開紀錄，上輪對利物浦嘅頭槌建功，令佢以39球成為英超史上士哥最多嘅後衞，「寸王」近日又自誇話若果冇佢，泰利可能已經離隊，抵佢咁招積。

西布朗排第13位已經提早上岸，今仗毋須同車仔搏命。同樣係防守專家，西軍領隊佩尼斯大讚莫連奴係天生贏家，總能夠用特別嘅風格激發球員潛能，佢仲話打算於賽前列隊歡迎呢支新任盟主，未踢已經認輸。既然兩軍都擅於防守，而且今仗係西布朗主場謝幕戰，預計佢哋都唔想大敗失禮粉絲，斯維覺得車仔好大機會又煲魚生粥僅熟，客Ｗ有1.78倍乃穩陣之選，不妨吼埋有1.78倍嘅入球細。