全北汽車搶頭胡

猪拉多纳

FC北京遇韓流騰騰震

亞冠盃16強首回合今晚展開，中超代表FC北京（北京國安）作客南韓球隊全北汽車，形勢危危乎！國安有「恐韓症」，自03年亞冠盃改制以來，15次鬥南韓球隊，錄得2勝4和9負劣績，作客更加未贏過。加上國安3線作戰，今仗係佢哋近10日第4場比賽，踢到腳仔軟，難抗全北汽車，要主W。

（now 671周二晚6時直播）

5月開始，北京國安進入魔鬼賽程，應付聯賽、足協盃、亞冠盃，全個月需要踢8場比賽，今仗係近10日第4戰，換言之平均唔夠3日踢1場，鐵人都頂唔住啦。雖然教練文沙奴近期採用輪換制，但由於受到傷兵問題影響，真正輪換人數並唔多。國安另一個問題係被南韓球隊食住，近12年15次於亞冠盃鬥韓兵，只係贏過兩次、輸9次，換言之輸波率高達60%。兩大不利因素夾擊下，前景難睇好。
藍翼復仇戰勝算高

全北汽車分組賽兩循環都以4比1大炒FC山東（山東魯能），盡顯中超剋星本色。陣中擁有去過英超搵食嘅名將李東國助陣，攻力有保證。呢位36歲前鋒寶刀未老，今屆已有4球進帳，以佢嘅級數，足以撕開國安防線。

另一支南韓球隊水原藍翼主場對日職代表柏雷素爾，藍翼兩年前分組賽，曾於主場2比6慘敗於柏軍腳下，堪稱奇恥大辱。不過時移世易，柏軍實力今非昔比，更陷入低潮，近4場冇波入，恐怕無力反擊，藍翼正好趁機報仇，要主勝。

（now 670周二晚6時30分直播）