阿仙奴玩謝黑貓

猪拉多纳

基奧特孭「7宗罪」要爭氣

今晚英超補賽，「三哥」阿仙奴主場迎戰排尾五嘅「黑貓」新特蘭。雖然「黑貓」只要打和便成功上岸，阿仙奴亦幾可穩奪第三，理應毋須搏盡，但賽前兵工廠箭頭基奧特遭傳媒列出應被賣走嘅「七宗罪」，今仗難得遇弱，正係畀「銀河唯一」數胡翻身嘅大好時機，斯維逆思考轉玩阿仙奴讓球主勝。

（now 621周四凌晨2時45分直播）

先講講護級形勢，新特蘭打少1場下領先尾三嘅侯城3分，只要喺最後兩輪攞多1分，就可護級成功，但睇番佢哋於煞科戰作客車路士，後者當日會舉行捧盃儀式，如此happy嘅日子，冇理由失分畀「黑貓」咁掃興。相反今仗對手阿仙奴日前逼和曼聯後，「三哥」位都幾穩陣，若果今仗打和的話，阿仙奴便領先第四嘅曼聯3分，得失球差亦保持7粒優勢，基本上穩袋呢張直入來屆歐聯分組賽嘅入場券，因此和波係皆大歡喜。
「銀河唯一」最叻恰弱旅

不過，世事又點可以諗得咁簡單呢！之前弗到漏油嘅阿仙奴箭頭基奧特突然「熄火」，已經6場食白果，近日英國傳媒更煽風點火，列出佢應被賣走嘅「七宗罪」，包括型仔但冇殺氣、速度慢、士哥總數低、入球率不配豪門射手、遇強隱形、亨利在內嘅名宿唔睇好，以及有傳阿仙奴想斟佢法國同胞賓施馬，畀人踩到變咗地底泥，同季中被捧到上天反差太大。「銀河唯一」不嬲好勝唔衰得，今仗難得撞正弱旅，仲唔發揮佢欺善怕惡嘅特性，盡情數胡玩謝「黑貓」唔畀佢哋咁快上岸咩？斯維決定逆思考，捧番阿仙奴讓球主勝。