祖記全力追素

猪拉多纳

爭3冠振興意甲球市

祖雲達斯邁向「三冠王」第二關，將於今晚意大利盃決賽作客鬥拉素。祖記以往唔多重視呢隻盃仔，但球隊今季有望一口氣擸晒意甲、意盃及歐聯錦標，所以點都會搏埋佢勢創三冠壯舉。意大利足總為遷就祖記備戰歐聯，特別將今場決賽提早於今晚舉行，幫到出晒面。祖雲達斯冇理由讓粉絲失望，祖記小讓平半，Mic少推介上盤。

（now 633周四凌晨2時45分直播）

祖雲達斯早前成功衞冕聯賽，上周中歐聯四強淘汰皇馬，為意甲球隊喺歐洲球壇爭口氣。事實上，近年意甲球市每況愈下，好需要創造一支「超級勁旅」振興市道，難怪意大利足總願意將意盃決賽提前大半個月舉行，擺明想幫祖記完成大業。

祖記對上一次捧意盃已經係95年，球隊累積九次奪冠，同羅馬並列捧盃次數最多嘅球隊，換言之贏埋今屆就可以十次捧盃，獨佔鰲頭，進一步提升球隊爭標誘因。祖記現時喺意國球壇大超班，上仗聯賽收起大半隊主力一樣擊敗國際米蘭，今場強陣出擊，拉素更加難招架。
拉素主場惡唔出樣

意盃決賽自08年改為一戰定死生後，一直安排喺羅馬奧林匹高球場舉行，變相令拉素有主場之利。不過面對祖記，恐怕地利幫唔到拉素幾多，因為佢哋近四次主場對祖記僅一和三負，包括今季聯賽慘吞三蛋，當時祖記最後二十分鐘仲踢少一人，可見雙方實力差距非常大，睇怕拉素今場只能再次束手就擒。