唔信曼聯讓路 護級其實冇懸念

猪拉多纳

今晚英超煞科日，焦點落咗喺護級區。先睇睇積分榜，尾四嘅紐卡素喺數字上仲未上岸，尾三嘅侯城護級仍未絕望，不過難度頗高，因為只要紐卡素擊敗韋斯咸，侯城就算贏100球都冇意義。老實講「老虎」要保住英超席位，只有兩個可能──渺茫同冇可能。點解咁講呢？

一來，Peter唔多信侯城今仗對手曼聯會讓路，始終紅魔係名牌球隊，為要向全球幾億球粉交代，如果輸畀侯城，謝幕戰都唔能夠好好睇睇，都咪話唔尷尬。二來紐卡素返回主場對韋斯咸，喺大批死忠粉絲吶喊助威下，「喜鵲」經常踢高一皮波，而且韋斯咸已經無欲無求，無謂阻頭阻勢喇，紐卡素應可簡簡單單、清清楚楚咁贏波逃出生天，毋須理會侯城嗰邊嘅賽果，而「老虎」則難逃降班厄運，下季要轉戰英冠。

講完英超護級形勢後，順帶提一提莫連奴今季領導車路士，由頭帶到尾重奪聯賽冠軍，並當選年度最佳領隊，絕對係眾望所歸。
準備周詳 寸王成功之道

其實「寸王」能夠取得佳績及咁有威望，除咗懂得審時度勢踢務實足球外，最重要係佢嘅準備工夫永遠做到足，Peter經常套用大師傅、美國大學籃球之父活頓嘅第一格言「failure to prepare is prepare to fail」，即係準備不足等於準備失敗，任何一名曾喺莫帥麾下効力過嘅球員或職員，大部分都讚嘆佢嘅準備工夫總係沒有最周詳，只有更周詳，因此「寸王」踏上名帥行列，絕非幸致。
金句：侯城唔使降只有兩可能：渺茫同冇可能