首都打吡齊獻細

猪拉多纳

拉素攰到暈 羅馬先求穩

今輪意甲壓軸之戰，上演「首都打吡」拉素主場對羅馬。由於拿玻里今輪輸波，拉素今仗只要打和，便穩奪前三嘅下屆歐聯外圍賽資格，而且「藍鷹」剛於上周中意盃決賽，同祖雲達斯激戰120分鐘落敗，未回得切氣隨時穩陣行先。至於「阿二」羅馬形勢上唔輸已經有着數，相信唔會冒進，揀入球細。

（TVB 302周二凌晨零時直播）

拉素季尾陷入「地獄賽程」，上周中硬撼祖記，餘下兩仗聯賽惡鬥羅馬同拿玻里。最唔好彩係拉素「地獄賽程」首站落筆打三更，痛失意盃之餘，消耗大量體力，陣中多位主力年齡偏高，尤其係首席射手高路斯已經36歲，恐怕回唔切氣，想強攻羅馬，亦有心無力。況且隨住「四哥」拿玻里尋日輸畀祖記，繼續落後畀拉素3分，令「藍鷹」今仗只要打和攞多1分，便穩奪前三嘅下屆歐聯外圍賽資格，相信會踢得更加保守。
客軍魯迪加西亞擅守

「阿二」羅馬以逸待勞，體力固然有優勢，形勢上亦對羅馬有利，事關佢哋煞科戰，主場對等收鑼嘅巴勒莫，贏面相當大。換言之，羅馬只要今場唔輸，續lead住拉素1分，好大機會獲得亞軍，直接取得下屆歐聯分組賽入場券。教練魯迪加西亞擅於防守戰術，上季更創出首10戰僅失1球佳績，既然羅馬和波都有利，冇需要同拉素鬥攻。魯迪加西亞正好可以採用最擅長嘅穩守踢法，疲兵拉素咬唔入羅馬，細盤有1.72倍捧得過。