北京煞車晉級創歷史

猪拉多纳

返地頭「恐韓症」康復！

兩隊同樣近7戰不敗，今晚場亞冠盃16強次回合北京國安（足智彩譯FC北京）對全北汽車，係典型嘅五五波，但係北京呢兩年主場對韓職球隊4戰未輸過，平手盤一定博1.92倍北京勝，怕走盤就要北京個1.78倍晉級啦。（廣東體育及中央5台周二晚7:30直播）

北京上星期作客全北打和1:1，手裏面揸住個作客入球，今日0:0和波都可以打入8強，創造球會嘅亞冠歷史，心理上佔有優勢。
全北輸作客入球焗攻

當然，主場同作客入球都不足以保證國安晉級，事關全北呢支韓國老牌勁旅向來以攻擊力強見稱，而且今戰佢哋全勝不可，估都估得到佢哋幾件猛嘢李同國、伊連奴肯定會一開波就向前谷，北京嘅中後防必然會承受巨大壓力，尤其睇番北京16次响亞冠盃遭遇韓職球隊，只得2勝5和9負嘅總戰績，更加令人對佢哋有啲擔心。

但係有句說話叫今時唔同往日，中超球隊呢兩年搵咗唔少外國好教練同外援，水準明顯提升咗，北京上場客戰全北，居然可以掌握63%控球率，證明佢哋完全頂得住全北嘅壓迫性踢法。
「西亞哨」對北京有利

大家仲要注意以下幾點，北京近兩年主場4戰韓職球隊取得2勝2和，响自己地頭基本上冇「恐韓症」呢回事，兼且全北件中場韓教元上場聯賽惡意拳毆仁川聯球員，引起全韓嘩然，球會嬲到將佢掟入雪櫃，今晚唔會披甲，加埋呢場波係「西亞哨」穆罕默德吹雞，北京喺分組賽2:0贏紅鑽就係佢執法，呢幾瓣都對北京有利喎。

首回合：北京客和1:1
亞洲聯賽冠軍盃賽制

採主客兩回合制，今輪為16強次回合。兩回合計打和，計算作客入球優惠，未分勝負則於次回合法定時間後加時30分鐘，加時階段不計作客入球優惠，再和互射12碼決勝。