迪尼普西維爾

猪拉多纳

奪冠玩歐聯肯定步步為營

歐霸盃決賽「新丁」鬥「老鬼」，首次入決賽嘅迪尼普對上屆冠軍西維爾，兩軍牌面看似懸殊，但要留意今仗喺中立場波蘭華沙舉行，迪尼普可謂佔半個主場之利，呢支烏克蘭球隊今屆憑穩健防守打出名堂，冇咁易失波。來到終極一戰，預料雙方都會比較謹慎，即使西維爾實力勝一籌，亦唔敢冒進，尤其上半場會先互相試探，換邊後再搏拳，揀2.1倍半場和。

（有線61、64、201及203台周四凌晨2時45分直播）

歐霸盃以往被列強視為雞助，但今屆開始歐霸盃冠軍可以取得來屆歐聯參賽資格，令賽事競爭性及可觀性大增。

論實力及經驗，迪尼普唔及曾3奪冠軍嘅西維爾，但呢支東歐新貴可以殺入決賽，證明非泛泛之輩。迪尼普採取經典弱隊穩守突擊戰術，由分組賽計起，14戰只入13球，但亦僅失10球，齋睇數字已知佢哋係一支「悶蛋球隊」。正因為迪尼普踢法非常保守，上述14場比賽，就有12場開出半場和，往往「泊大巴」防守，靠一兩次少有嘅機會偷襲對手，最佳例子必定係4強首回合對拿玻里，全場只有3次攻門，卻因旁證漏判越位，戲劇性追和1比1，成為打入決賽嘅關鍵，既然「泊大巴」戰術奏效，相信會繼續沿用。
華沙開戰 迪軍有「地利」

迪尼普仲一大利好因素，就係比賽喺華沙舉行，烏克蘭同波蘭屬於鄰國，兩國3年前就聯手辦歐國盃決賽周。迪尼普喺地利、人和佔有優勢，可以迅速站穩陣腳，西維爾要咬入佢哋，並非易事。

不過，西維爾始終係歐霸專家，由06年至今14年間已3奪冠軍，今屆贏埋就會成為捧盃次數最多嘅球隊。呢支西甲球隊淨靠經驗已經夠贏迪尼普，估計佢哋會睇定來踢，慢慢搓開對手鐵桶陣。迪尼普上半場或者仲頂得住，但久守必失，相信冠軍仍然會落入西維爾手中。不過，西維爾齋W1.52倍乏味，讓半一又太辣，揀半場和啱數。