新丁迪尼普輸經驗 西維爾衞冕搶W

猪拉多纳

歐霸盃決賽今晚喺波蘭華沙爆發！烏克蘭球隊迪尼普大戰西甲勁旅西維爾，兩隊都係實而不華嘅實力分子，可以預期呢場會係一場高水準嘅決戰。嚟到呢啲一場過嘅大戰，好睇臨場發揮，「歐霸專家」西維爾個個見慣大場面，射手卡路士巴卡亦狀態大勇，對住首次入決賽嘅新丁迪尼普，有望贏波實現衞冕美夢，一於捧1.52倍西維爾客勝！

（有線61、64、201及203、廣東體育周四凌晨2:45直播）

西維爾分別喺2006年、07年同舊年三度殺入歐霸盃決賽，捧盃率達百分百，如果今鋪搞掂埋，就會超越國際米蘭、祖雲達斯同利物浦，成為第一支4奪冠軍嘅隊伍，試問班球員點會放過締造歷史嘅機會！西維爾過去4次對烏克蘭球隊3勝1和未輸過，07年捧盃嗰屆，亦曾經喺16強淘汰薩克達，今場對住迪尼普，當然信心十足。
西維爾決賽3戰3勝 挑戰4冠紀錄

呢場波喺波蘭上演，西維爾嘅波蘭國腳中場基祖華克自然特別受歡迎，而法國後衞高洛薛斯沙克亦生於波蘭，可以幫西維爾搶多啲現場擁躉。不過，最重要嘅一定係哥倫比亞射手卡路士巴卡，今屆歐霸盃佢雖然只入咗5球，但有4球係喺淘汰賽階段轟入，今場決戰佢隨時再做「關鍵先生」。

何況，今場判官係44歲英格蘭球證艾堅遜，佢今屆唯一一次吹歐霸，咁蹺係16強次回合西維爾對維拉利爾，最終前者贏波出線，09/10球季歐聯分組賽西維爾1:1和史特加都係佢執法，睇嚟佢都幾旺西維爾喎。
迪尼普首入決賽靠運

迪尼普歷史性殺入歐霸決賽，其實幾有運，分組賽6場波輸3場竟然都可以以次名出線，16強對阿積士就靠作客入球晉級，4強淘汰拿玻里入決賽，竟然連球證誤判都出埋！你話幾咁好彩？不過嚟到決賽點都係經驗行先，西維爾有上屆捧盃經驗，今場出錯機會肯定減少，迪尼普想偷雞難啲囉！
盤路解碼：近8屆歐霸盃決賽有6場開出「半場和」。

Data King：西維爾專恰烏克蘭球隊

‧迪尼普連續5場歐霸盃開出「0:0」半場波膽。

‧西維爾喺歐洲賽鬥烏克蘭球隊未輸過，4戰錄得3勝1和。

‧西維爾近9仗歐霸盃取得8勝1和不敗佳績。
乜都玩錦囊：信往績追半場0:0波膽

迪尼普踢法穩字行先，今場鬥衞冕嘅西維爾唔慌進取得去邊，既然佢哋連續5場歐霸盃都開出「0:0」半場波膽，加上近8屆決賽有6場開出「半場和」，今場不妨追晒呢兩瓣！
頂占筍盤：西維爾（客勝）