睇好「廠仔」超越紅魔

猪拉多纳

早年經常被恥笑為「N年無冠」的阿仙奴，近季似乎終於爭番啖氣，繼上季後再度打入足總盃決賽，如能衞冕成功，便會取代曼聯成為這項歷史悠久的盃賽，史上奪冠次數最多的球隊！我亦睇好在足總盃屢有好表現的基奧特，在今晚對阿士東維拉的決賽協助「兵工廠」再次捧盃！

阿仙奴已是第19次打入足總盃決賽，更與曼聯一樣11次奪冠。今次我看好「廠仔」，全因基奧特不但過往在足總盃上陣13次，已交出7入球及4助攻，而且近3次面對阿士東維拉他都有進帳，配合近況大勇的禾確特，絕對有能力在90分鐘內解決對手，順利衞冕。
維拉爆冷有難度

維拉亦曾7奪足總盃，但那段光輝歲月早已過去，對上一次奪冠已是58年前；他們上次殺入這項決賽已是2000年以0比1不敵車路士。論近況，阿仙奴頻頻和波或未算太好，但維拉最近兩戰全敗，更應睇低一線，除非賓迪基又再在面對「兵工廠」時「上身」省幾粒，否則實在難以爆冷。