多蒙特禾堡終極大戰

猪拉多纳

旗鼓相當 各懷自信

德國盃終極戰，多蒙特同禾夫斯堡會師柏林奧運球場，爭奪第72屆德國盃冠軍。今次係班霸拜仁慕尼黑近四年來首度無緣決賽，亦令雙方對冠軍充滿憧憬，都相信自己可以贏得冠軍，兩軍都攻強守弱，1.59倍大盤係穩陣之選。基於彼此實力旗鼓相當，求好分可以博埋3.5倍和波。

（無綫翡翠台及TVB 13台周日凌晨2時直播）

多蒙特曾經三奪德國盃冠軍，對上一次係2012年決賽以5比2擊敗拜仁，但之後至今已經鬧咗三年錦標荒，今場係功勳教練高普領軍嘅最後一場比賽，隊長基爾、中場根度簡亦已確定踢埋今仗就離開，全隊上下當然想捧盃同佢哋告別，事實上球隊下半季後勁凌厲，能夠從一度包尾殺上聯賽榜第七位過終點，取得下屆歐霸盃入場券已經係一個奇迹，今晚全軍上下對爭勝都充滿信心。事實上多蒙特過去39次同禾夫斯堡交手，取得19勝11和9負優勢，德國盃唯一對賽係兩年前，多蒙特亦喺準決賽贏過2比0，加上主力攻擊手馬高列奧斯、香川真司同奧巴美揚都及時回勇，今晚實行以攻代守同禾夫斯堡駁火。
撐大盤兼顧和波

禾夫斯堡從未攞過德國盃，過去唯一一次打入決賽已經係20年前嘅事，而且自2009年攞過聯賽冠軍後，已經六年未嘗冠軍滋味，對獎盃比多蒙特更飢渴。禾堡優勢係球員比多蒙特更當打，而且今季整體表現比多蒙特更勝一籌，陣中除咗大熟大勇嘅奇雲迪布尼領軍外，一眾攻擊手巴斯杜斯、卡利古尼同比列錫都處於佳態，今晚當然有足夠信心同多蒙特對攻，激戰可期，仲預期分分鐘要踢到加時決勝，除大盤外，和波有好分頭亦值得一試！