維羅納祖記大駁火

猪拉多纳

東尼泰維斯爭神射手

意甲來到最後一輪賽事，今晚焦點落喺神射手之爭；維羅納主場對祖雲達斯，雙方首席「士哥拿」東尼同泰維斯交鋒鬥數胡。38歲嘅東尼力爭成為意甲史上最老神射手獎得主，球隊全力助攻畀佢破紀錄，勢必大踢進攻足球。祖記前鋒泰維斯亦想攞獎，向巴塞同胞美斯「示威」，為歐聯決賽壯聲勢。入球大賠率熱爆1.5倍有道理，進取啲要埋2.2倍半場大。

（TVB 301周日凌晨零時直播）

剛於周二度過38歲生日嘅東尼上仗梅開二度，今季聯賽已轟入21球，升上射手榜首位，比兩位阿根廷前鋒泰維斯及莫路伊卡迪多一球。意國普遍球迷都支持東尼可以帶到尾，創造意甲歷史。維羅納教練文多連尼更講明，今場比賽唯一目標就係協助東尼入多幾粒。所以今仗維羅納肯定有前冇後，成隊波谷晒上去，全力為東尼製造入波機會。

不過維羅納壓前進攻，防線難免空虛，變相更方便作客嘅祖記中前場球員搵食。除咗泰維斯要爭做神射手之外，艾華路莫拉達近況亦好弗，甚至連馬特尼近期都鹹魚翻生，斑馬兵團要入波絕對唔成問題。最難得係祖記奪得意甲冠軍後並冇收油，上仗即使副選出擊，都喺主場以3比1擊敗拿玻里。呢一刻嘅祖記要保持氣勢，準備6月7日凌晨歐聯決賽硬撼巴塞，所以今仗應會主攻，搵維羅納祭旗。
基迪拉自由身投祖記

另外，德國國腳基迪拉已通過體測，估計呢位皇馬中場將於一星期內，正式以自由身加盟祖雲達斯，雙方簽約四年，基迪拉年薪高達400萬歐元。