兵工廠維拉 溫布萊大激鬥

猪拉多纳

英法西德盃賽決戰 今晚齊齊上演　

歐洲4大聯賽決戰日Kick Off！各地聯賽相繼煞科後，壓軸戲嘅盃賽王者戰今晚上演，而且係一口氣送4場精彩決賽畀球迷！英格蘭足總盃、德國盃、法國足總盃同西班牙盃連環上演，想食埋前菜仲有蘇格蘭足總盃決賽恩華尼斯對福爾柯克添！阿仙奴、多蒙特、巴黎聖日耳門同巴塞隆拿幾支熱門可唔可以順利捧盃？大家要拭目以待！

英超球季壓軸戲足總盃決賽，今晚喺溫布萊球場爆發！衞冕嘅阿仙奴決戰阿士東維拉，牌面上當然贏晒，但大家要記住足總盃係爆冷溫床，上屆阿仙奴對住侯城都係幾經辛苦先捧盃，維拉有狀態大勇嘅射手賓迪基帶住，有力同火力強大嘅阿仙奴駁火，捧1.75倍入球大就夠晒穩陣啦！
維拉賓迪基9場入9球

兵工廠上季靠足總盃打破9年獎盃荒，今年希望再接再厲，但嚟到決賽唔係實力高就贏硬，記得上屆佢哋喺落後2球下，幾經艱難先追和2:2，然後喺加時反敗為勝。事實上，阿仙奴應付高空波經常有甩漏，維拉有近9場入9球嘅賓迪基衝鋒陷陣，隨時可以好似侯城咁偷到阿仙奴雞。

廠仔向來崇尚進攻，今場領隊雲格就有大把武器喺手，全隊依家只得韋碧克一個傷兵。今季長期養傷嘅禾確特喺上星期煞科戰擔正即入3球，證明狀態返晒嚟，但佢今場仍可能要先做基奧特同阿歷斯山齊士嘅後備，加上另一傷愈復出嘅阿歷士張伯倫同上場入世界波嘅韋舒亞，阿仙奴嘅後備席隨時可以扭轉乾坤。
阿仙奴後備兵一樣掂

對手阿士東維拉下半季表現出色，小妹對佢哋喺4強戰淘汰利物浦一仗印象最深，維拉鋒力唔差，成班球員快上快落，踢得相當起勁！領隊舒活講到明踢完今晚場大戰之後會嚟個「大清洗」，班球員為咗保飯碗，今晚一定博表現，維拉喺溫布萊唔似會死守，相信會同阿仙奴合演一場入球騷。
Data King：廠仔足總盃11戰不敗

‧阿仙奴近7次鬥維拉，當中5仗半全場都領先對手。

‧維拉連續4場足總盃賽事射入2球。

‧兵工廠連續11場足總盃不敗。
乜都玩錦囊：阿仙奴猛火捧上盤

阿仙奴上仗派禾確特擔正箭頭，原先係想畀基奧特抖足應付今仗，點知「禾仔」踢咗半場未夠就戴帽，基奧特話冇壓力就勢係假，今場肯定搏晒命，隨時炒起近2仗喪失7球嘅維拉，就算讓1球照捧1.81倍上盤。
盤路解碼：維拉近21次出戰足總盃開出19口大，比率約9成。