打決賽士砵亭恰慣布拉加

猪拉多纳

今晚繼續上演盃賽終極戰，葡萄牙盃決賽士砵亭對布拉加，賽事喺中立場奧爾拉斯國家球場舉行，位置上鄰近士砵亭大本營，令佢哋佔有地利優勢，加上呢支葡國傳統「Big 3」近7次鬥布拉加，獲得全勝，完全剋死對手。睇好士砵亭可於法定時間贏波捧盃，直取1.88倍主W。

（有線155台周一凌晨零時15分直播）

葡盃好旺里斯本球隊，過去74屆有43屆冠軍來自里斯本，包括士砵亭15次捧盃，好大程度上因為葡盃決賽一直喺呢個首都城市或周邊地區舉行，所以士砵亭今仗猶如有主場之利。士砵亭今季由37歲少帥馬高施華執教下，踢法相當進取，平均每場入近兩球，其中曼聯借將拿尼更「鹹魚翻生」，今季聯賽都有7球進帳，仲不時貢獻助攻添。

反觀布拉加尾季走晒樣，近7仗僅1勝，包括聯賽以1比4慘敗喺士砵亭腳下，同時，布拉加近7次正式賽事對士砵亭全敗，今仗交鋒未踢已先輸氣勢。值得一提嘅係，布拉加雖為葡超「4哥」，但積分比第3位士砵亭少18分，可見雙方實力差距甚遠，士砵亭可望繼08年後，再嘗葡盃冠軍滋味。
賓菲加葡聯盃封王

另外，葡超盟主賓菲加喺前晚葡聯盃決賽，憑莊拿斯干卡維斯及奧拉約翰各入1球，以2比1擊敗馬里迪莫，衞冕成功，兼成為「雙冠王」。