尼日利亞巴西 細均力敵

猪拉多纳

兩件王牌合演「曼市打吡」

U20世青盃E組有好戲碼，尼日利亞U20聽朝對巴西U20場「曼市打吡」，玩入球細好過。賽前尼日利亞U20教頭加巴講明，絕對唔會赦「森巴兵團」，況且佢哋陣中有10號仔、曼城中場艾希拿曹壓陣，相反，前巴西U20教頭加路喺3個星期前被趕扯，即使有曼聯新星安達斯彭利拿孭飛，但件射手羅拔堅尼地又因傷退隊，咁嘅情況，玩細最好。

（開賽時間：周一早上9:00）

尼日利亞U20係今屆U20非國盃冠軍，教頭加巴手上有唔少好球員，除咗CF格蘭納達前鋒艾錫瑟薩斯試過喺今季西甲入波，曼城一對中場艾希拿曹同尼華卡利仲係今年嘅焦點新星，牌面唔輸蝕，難怪加巴話到明唔驚巴西啦，照咁睇，尼日利亞U20被炒起嘅機會真係好低。
森巴軍新帥未摸熟班波

另邊廂，巴西U20喺5月8號先宣布炒領隊加路魷魚，據講佢冇得留低，主要原因係得罪巴西國家隊教頭鄧加，消息仲話，鄧加打算嗌足總加人工畀佢，領軍玩埋出年嘅里約奧運足球賽，加路突然被趕走，接手嘅米卡利邊夠時間摸熟隊波好好備戰呀？

仲有，今年喺U20美洲國家盃攻入4球嘅前鋒羅拔堅尼地，早前因傷退隊，最慘係部分主力成員，根本未夠班喺球會躋身一隊，最大牌嗰件係曼聯中場安達斯彭利拿，雖然佢係「小紅魔」主力，只可惜冇咩隊友夠級數夾到佢，呢場「世青曼市打吡」，都係玩入球細最好！
Data King：超霸鷹例入淘汰賽

‧尼日利亞U20近7次參賽，未試過喺分組賽出局。

‧巴西U20曾經5奪世青盃冠軍。

‧巴西U20未曾喺分組賽被淘汰。
世青盃賽制：

現為分組賽階段，24支球隊分6組踢單循環，每組首2名及4支最佳小組第3名入16強。