漢堡傷鋒入波唔慌多

猪拉多纳

拎過6次德國頂級聯賽錦標嘅漢堡，竟然衰到連續2季要參加附加賽嚟保住德甲席位。呢支從未缺席任何一季德甲嘅老牌球隊，首回合幾經辛苦先逼和卡爾斯魯厄1:1，今晚次回合將會殘陣作客呢支德乙主場防守王，相信都冇啖好食，心水推介1.65倍入球細。

（有線61、64、201、203及廣東體育周二凌晨1:00直播）
漢堡首次席射手倦勤

漢堡喺德甲煞科日以2:0擊敗史浩克04，最終保住一絲護級希望。之不過呢班波頹勢未止，首回合只能同卡爾斯魯厄打和1:1，換言之今場波佢哋一定要士哥先有價講。只不過漢堡今季17場聯賽作客入得9球，前鋒奧歷早前休克入咗醫院仲未必上陣，次席射手哥高加卡、中場比哈美、後衞馬素贊臣等人又唔踢得，咁唔齊章真係想入番粒都難。
卡爾斯魯厄 主場17戰僅失7球

最大鑊係對手卡爾斯魯厄揸住個作客入球，今仗只要守和0:0都可以升班，而且防守正正就係佢哋嘅強項！何況佢哋主場聯賽17戰失7球，冠絕德乙，最後7輪主場比賽更5次零封對手，家陣佢哋大條道理喺自己地頭玩死守，漢堡仲點攻破人哋銅牆鐵壁先？都係玩入球細最划算！
首回合：卡客和1:1