日立球場「柏浦戰」例開大騷

猪拉多纳

柏雷素爾今日响日立柏市足球場迎戰浦和紅鑽，唔使諗直取1.78倍入球大就得嘞，因為兩隊喺呢個場交手3次，從未試入少過3球，冇理由博個只係高水些少嘅入球細。

（開賽時間：周三晚6:00）

呢場日職雖然係排名15嘅對「一哥」，表面睇冇乜競爭性，不過柏、浦和兩隊咁多年對碰，好少出現悶場，柏主場14戰浦和，就有12次開大，當中3次係日立呢個場較量，更加全部大晒，入得最少嗰場日聯盃，柏只係小勝2:1，一樣開咗個大。
射手撻着晒火力猛

除咗個場旺大，最重要係柏雷素爾雖則聯賽戰績麻麻，實質係佢哋前段日子過分專注亞冠盃所累，工藤壯人、李安度蒙迪拉同基斯坦奴達施華3個鋒將，聯賽合共有9球斬獲，係個唔錯嘅三叉戟組合。浦和就仲勁，累計入到4球以上嘅中前場球員，有武藤雄樹、關根貴大、隆比真歷、興梠慎三同梅崎司5個，武藤、關根兩件新貴仲連續3及4場有進帳，雙方射手都撻到着晒，又點可能唔開大呢？
日聯盃賽制

現為分組賽階段，2組7隊進行單循環比賽，每組首2名躋身8強。