愛爾蘭悶鬥三獅兵

猪拉多纳

大家唔想輸 齊打穩陣波

今晚有場矚目嘅國際熱身賽，就係愛爾蘭主場對英格蘭，雖然熱身賽又可以叫做友誼賽，不過呢兩隊碰頭，就唔可以用「友誼」嚟形容，事關兩國喺歷史上嘅恩恩怨怨真係講極唔完，嚟到足球層面上，雙方一樣要為面子而戰，即使唔贏都唔可以輸！預計兩軍今場都未必敢太冒進，戰情甚至會幾悶，入球細值得一博！

（有線61、64、201及203台周日晚8時直播）
鶴臣貫徹保守作風

英格蘭今次公布嘅大軍名單裏面，除咗朗尼、佐敦軒達臣、史達寧、赫特等常規國腳入選外，三名新丁包括昆士柏流浪前鋒查理柯士甸、李斯特城箭頭占美華迪同般尼門將湯希頓亦獲徵召，不過相信只係跟住隊先，落場機會唔大。而「三獅軍團」踢完今場後，再下個星期日就會喺歐國盃外圍賽作客斯洛文尼亞，論重要性當然係下一場，不過唔代表英格蘭今場對愛爾蘭可以Hea踢，相信以領隊鶴臣一貫保守作風，應該又係穩守先求不敗，因此今場預咗入波唔會多。

愛爾蘭無論喺國際地位抑或足球層面，一向都被外界視為英格蘭嘅「細佬」，好多球員都選擇做「三獅兵」，最近就有阿士東維拉當紅炸子雞基亞利殊，呢位19歲進攻中場可以選擇代表英格蘭同愛爾蘭，佢喺青少年時一直代表愛爾蘭出戰，但上個月主帥奧尼爾為大國腳點兵時，基亞利殊竟然拒絕入選，當時表面上係想專注為維拉護級，但好明顯佢係因為知道代表英格蘭前途較好，所以就嫌棄愛爾蘭。
近5次交手全開細

愛爾蘭一而再、再而三被「落面」，今場對「三獅軍團」又點會係友誼賽咁簡單？即使球隊實力比對方稍遜，但主場出戰都唔可以輸，教頭奧尼爾一樣係踢穩守突擊戰術，希望悶到英軍出錯博偷雞，加上雙方近5次交手全部開細，科娜強烈建議大家再追細！