愛爾蘭鋒力曳

猪拉多纳

三獅兵有計

4大聯賽收咧大家唔使怕，今晚愛爾蘭喺都柏林主場對英格蘭嘅熱身賽，就有直播睇喇。雖然愛爾蘭已經連續5次對賽不敗，每次對英格蘭都會打高半班波，但今次問題係隊長羅比堅尼延遲歸隊，呢場波唔使預佢，如果英格蘭咁都唔贏，就真係笑大球迷個口咯，撐「三獅兵」1.83倍客勝！

（有線61、64、201及203周日晚8:00直播）
羅比堅尼獲准免役

愛爾蘭當正英格蘭係死對頭，近5次對賽鑊鑊打甩門牙帶血吞，獲得1勝4和嘅佳績，就算喺世盃或者歐國盃遇到對方都頂得住。只不過咁喎，近排洛杉磯銀河喺美職踢到一鑊粥咁，佢哋已經同愛爾蘭領隊奧尼爾傾掂數，唔使羅比堅尼歸隊披甲，就算愛爾蘭重視今場大戰，但冇咗呢件王牌射手，靠沙恩朗、禾達斯呢啲二打六前鋒，仲點數胡呀？

冇錯，英格蘭今仗都有唔少球員缺陣，除咗利物浦射手史杜列治養傷，熱刺前鋒哈利卡尼因為要幫英格蘭U21比賽，今場都冇預佢玩。不過大家唔好忘記，現時英格蘭陣中仲有大把球星，特別係隊長朗尼打番正前鋒，拍住回勇嘅禾確特，隨時又發威，客勝抵撐。