美軍征德國大無畏

猪拉多纳

掃完世盃季軍場未夠喉

今晚免費台有好波睇！德國於國際熱身賽布陣科隆萊茵能量主場迎戰美國，兩軍主帥勒夫同奇連士文呢對老拍檔又聚頭。美國踢熱身賽向來認真，球隊啱啱喺香港時間上周六凌晨作客世界盃季軍荷蘭，憑將士用命史上首次擊敗對手，贏4比3打得燦爛，贏完呢場波士氣大振，今晚挑戰世界盃冠軍德國一樣夠膽放懷對攻，主隊防線大執位面目全非，預期又係一場對攻好戲，入球大係過關首選，求好分可以博埋2.15倍嘅半場大。

（無綫翡翠台及TVB 13周四凌晨2時45分直播）
熱身賽對壘例多波入

美國隊為備戰美洲金盃，今次刻意挑戰兩支世界盃三甲球隊，陣中雖然有鍾斯、艾迪杜里同艾真度比杜亞等主力因傷避戰，老將丹普西陪太太待產未有入選，但幾名英超德甲兵配合一眾美職戰將，表現虎虎有威，今晚去到德國一樣冇理由龜縮，翻查兩軍對賽紀錄，近年喺世盃碰頭例踢得謹慎，德軍喺2002同2014年決賽周都係小勝1比0，不過踢熱身賽就係另一回事，雙方自02年至今三度拍跳，德國先贏4比2同4比1，兩年前德軍殘陣作客美國卻輸番場3比4，總之只要唔係正式比賽，兩軍碰頭入波一定多。
大盤太熱寧博半場大

德國隊今次任務除咗熱身賽對美國，仲有嚟緊香港時間周日凌晨歐國盃外圍賽作客對直布羅陀，基於歐洲球季已結束，而直布羅陀只係魚腩部隊，領隊勒夫體恤一批搏足成季嘅主力戰將，畀佢哋休息，今次起用大批邊緣國腳同新人，尤其防線大執位，除咗門將紐亞因輕傷休戰外，成條防線將會起用經驗有限嘅新丁，不過佢哋中前場依然人才濟濟，主場出擊唔憂冇波入，入球大得1.48倍太熱，寧博半場大。