德美老友聚頭開大P

猪拉多纳

今晚嘅熱身賽都幾有睇頭，德國喺科隆主場對美國，老友聚頭睇怕會開「大」派對。雖然講牌面德國明顯超班，但佢哋嘅主帥勒夫，曾經係美國教頭奇連士文嘅助教，今場佢專登收起幾個主力，包括門將紐亞玩讓賽，無非想大家踢吓快樂足球，互相有波入開心吓啫！（翡翠台及TVB13台周四凌晨2:45直播）

勒夫同奇連士文曾經喺德國國家隊合作多年，分開發展後依然係好朋友，經常錫住對方，好似前年美國就試過喺熱身賽以4:3砌低德國。上年兩隊喺世盃分組賽碰頭，美國只係以0:1不敵德國，最後仲以較佳得失球差，壓倒同分嘅葡萄牙出線，你話勒夫冇關照奇連士文，我就唔信囉！
收起紐亞 梅拿等主力

事實上，今次勒夫無厘頭安排多蒙特中場馬高列奧斯、隊長曉姆斯、拜仁中場湯馬士梅拿、後衞謝路美保定同門將紐亞休息，擺明係想拉近同美國嘅實力差距，希望場波唔會冇得打，特別係後防刻意排出殘陣，除咗想鬆章畀美國入波大家開心，我就諗唔出第二個理由嘞。

另一方面，美國有西雅圖海灣者隊長丹普西同新英倫革命中場鍾斯因傷冇辦法歸隊，但總算有洛杉磯銀河射手薩迪斯、FC多倫多中場米高巴特利同奧蘭多城中場碧舒亞壓陣，何況佢哋有5個喺德國落班嘅球員入選，睇怕至少唔會捧蛋咁肉酸，兩隊都有波入冇咁傷感情嘛！