智利做東 -1唔厄人

猪拉多纳

美洲國家盃聽朝開鑼

美洲國家盃盃開鑼「智」珠在「厄」！今屆美洲國家盃聽朝隆重開幕，打頭陣係A組東道主智利喺聖地亞哥硬撼厄瓜多爾，智利王牌阿歷斯山齊士（A山）心中嗰團火燒到慶合合，隊友維達爾失落歐聯冠軍亦嬲到出晒煙，呢兩舊炸彈勢必狂炸天殘地缺嘅厄瓜多爾，讓球盤智利要讓一球，照撐上盤打響頭炮。

有睇開A山踢波嘅話，都知道呢位阿仙奴球星爭勝欲極強，就算踢前鋒都經常返後助守搶波，堅有鬥心，日前喺熱身賽小勝薩爾瓦多一粒，佢因搶咗隊友馬些路戴亞斯射罰球機會，搞到鬧交兼幾乎開拖，雖然有啲獨食Feel，但亦證明A山心中嗰團火燒得熾熱，對贏波非常上心。至於中場隊友維達爾，剛成為史上首位參與歐聯決賽嘅智利球員，可惜其効力嘅祖雲達斯功虧一簣不敵巴塞隆拿，梗係深深不忿喇，惟有將成肚火轉化為爭奪美洲盃嘅動力。智利主帥森柏奧利崇尚進攻打法，甚至常踢三人防線，前場壓迫更係佢戰術精髓，因此勤力過新界耕田啲牛嘅A山同維達爾，便成為中前場不斷施壓嘅發電機，壓到對方有氣冇碇抖。
厄瓜多爾殘陣等劏

另一邊廂，厄瓜多爾日前喺熱身賽大炒巴拿馬四球，但對手太弱不能作準，而且愛斯賓奴射手卡些度、CF阿美利加中場米高阿羅約同曼聯翼鋒路爾斯華倫西亞因傷落選，陣容不整，韋斯咸前鋒安拿華倫西亞季中已開始跌Watt，史雲斯中場謝法臣蒙迪路都喺季尾先傷愈復出，就算回勇亦獨力難支，加上呢班波一離開高原主場就唔識踢波，實畀智利猶如搶錢開飯嘅前場逼搶打亂陣腳，今仗輸少當贏，讓球盤智利要讓一球都冇有怕，斯維力撐上盤。