比利時缺雙尼難攞「威」

猪拉多纳

比利時鋒線猛將如雲，夏薩特、賓迪基、盧卡古、梅頓斯個個獨當一面，但佢哋鬥威爾斯偏偏冇晒計，事關佢哋近兩次對決主場出擊都贏唔到。今晚兩軍喺歐國外B組再次碰頭，「歐洲紅魔」更有費蘭尼同高柏尼兩員大將缺陣，作客讓半一制唔過，揀威爾斯1.9倍下盤。

（有線64及203、CC5周六凌晨2:45直播）
威爾斯巴利 藍斯默契夠

「歐洲紅魔」喺B組累積攻入13球，但當中11球係主場大勝「魚腩」安道爾同塞浦路斯時所取得，擺明欺善怕惡，今場作客唔似恰到同組最強對手威爾斯。係，比利時上場熱身賽靠費蘭尼交出兩入球一助攻，最終以4:3擊敗法國確係幾精彩，弊在呢名中場樞紐賽前拉傷腹股溝唔踢得，加上隊長兼中堅高柏尼要坐波監，真係唔值得捧場囉。

另邊廂，威爾斯雙星加里夫巴利同艾朗藍斯勁有默契，上輪歐國外造訪以色列互相造就對方入波，夾手夾腳包辦全場3個入球，呢對孖寶今戰返到主場攜手出擊，有望威脅比利時防線。更何況首循環對決時缺陣嘅中場安迪京治同中堅占士謝斯達，今場可以復出搏殺，睇好佢哋有力同陣容不整嘅比利時周旋到底，受讓梗係要撐啦！