阿根廷不勝無圭

猪拉多纳

美斯登場！

美洲國家盃B組輪到球王出場，阿根廷聽朝對巴拉圭，簡直係黃金一代對黃昏一代！阿根廷今屆以最強陣容出戰，擺明要拎冠軍，相反巴拉圭嘅前線組合辛達告魯斯同希度華迪斯過晒氣，梗係捧阿根廷1.84倍「讓球主勝」最正路啦！

（now681台周日清晨5:30直播）

除咗04年同08年奪得奧運足球賽金牌，阿根廷已經超過20年未拎過大賽冠軍，上年佢哋喺世盃決賽不敵德國，美斯近日接受訪問話，總有一日要捧世盃，今次美洲盃就係時候磨吓刀喇！
重召泰仔強陣爭盃

查實大家都知，阿根廷日前喺熱身賽以5:0打爆玻利維亞，已經盡顯霸氣，呢場波美斯同泰維斯因為要應付歐聯決賽冇份踢，但依然有阿古路大演帽子戲法，迪馬利亞更加係踢爭氣波梅開二度，證明阿根廷嘅黃金一代真係勁得人驚！

今鋪美斯球王回歸，賽前有消息話阿古路擊敗泰維斯同希古恩，贏出「9號之戰」擔任正選，受傷嘅加高亦會由碧基亞頂上，亦即係話，美斯、阿古路同迪馬利亞拍住上，有咩依郁就換希古恩同泰仔搏殺，即係睇到呢批人名，都已經知呢隊波有幾咁恐怖啦！

話巴拉圭踢法似「龜」，其實一啲都唔過分，皆因佢哋係南美球隊當中，係少數鍾意玩守勢足球嘅二線波，而且佢哋喺巴西世盃外圍賽得3勝3和10負包艇，成績仲衰過玻利維亞，證明佢哋嘅踢法已經不合時宜，邊有能力同阿根廷講數呀？
巴拉圭仲係「雙斯」孭飛

其他唔講，淨係睇辛達告魯斯上年離開馬拉加後要去墨西哥捱世界，希度華迪斯上季加盟法蘭克福前，去過俄羅斯、阿聯酋同希臘落班，就知佢哋好打有限。何況計埋希度華迪斯，巴拉圭只得4個球員喺歐洲4大聯賽搵食，邊似惡得出樣呀？