巴西誓炒秘魯搶頭胡

猪拉多纳

尼馬成王之路再出發

尼馬成「王」之路重新起步！由尼馬擔正做隊長嘅巴西，明晨喺美洲國家盃C組賽事首度出擊鬥秘魯。「森巴軍團」今屆參戰目標明確，就係以尼馬作為核心，一洗國家隊喺2014年世界盃敗走嘅恥辱外，更希望重新鞏固巴西「新球王」地位，甚至同美斯拗手瓜，挑戰年尾嘅國際足協金球獎！可想而知巴西喺今屆賽事必定搏甩髀，咁啱首仗面對「私房菜」秘魯，阿謙睇好巴西可以由一場大勝作起點，熱捧1.75倍讓球主勝。（now 681周一清晨5時30分直播）

「森巴軍團」名氣雖響，但其實佢哋近年喺國際大賽嘅成績麻麻，得2013年贏過洲際國家盃冠軍，喺2014世界盃坐擁主場之利都只得一席「梗頸四」，其中4強被德國大炒7比1更加係奇恥大辱。「森巴兵團」深知要令球迷重拾信心，目標自然瞄準今屆美洲國家盃，希望自2007年後再嘗冠軍滋味。

喺世盃失利後，巴西由該國名將鄧加重掌帥位，而鄧Sir亦深明要重建「森巴兵團」，尼馬能否發揮出「球王級」表現最為關鍵，故此建軍都以輔助尼馬成「王」為中心，中場起用踢法實際兼硬淨嘅費蘭甸奴及伊利亞斯文迪斯出任雙防中，側擊就交畀韋利安同菲臘比古天奴，鋒線則有「大隻佬」迪亞高泰達利開路，等尼馬可以專注進攻。雖然後防仍以大衞雷斯及堤亞高施華扼守中路，不過睇番近期兩場熱身賽對墨西哥同洪都拉斯，佢哋都可以全身而退，今仗只要發揮水準，淨勝兩、三球已經係基本要求。
秘魯近30年係私房菜

反觀秘魯陣容就變化不大，仍以荷西古里路、法芬、比沙路及祖安華加斯為主力，可惜佢哋都已經年過30，而且部分喺歐洲搵食嘅外流兵收咧冇耐就轉戰美洲盃，身心俱疲下未必能及時再操起狀態。另外，秘魯一向都係巴西嘅「私房菜」，佢哋上次擊敗「森巴兵團」已經係1985年，距今已有30年之遙！如今兩軍實力更加懸殊下，相信今仗都好難走得甩，巴西「-1」熱得有道理咪走寶。