美國U20贏埋都得

猪拉多纳

塞爾維亞搏殘點讓波？

今日下午世青盃上演兩場8強， 美國U20表現令人驚喜，上圈90分鐘內解決哥倫比亞，今仗對塞爾維亞U20仍有得受讓，實在被低估。塞爾維亞U20上仗同匈牙利激戰120分鐘先贏波，緊密賽程下好易腳軟，寧捧美國U20讓球主勝。（周日中午12時30分開賽）

美國U20今屆條路行得好順，連贏頭兩場分組賽，提早獲得出線權，令到第3場可以派副選上陣，畀主力抖下氣。果然16強成功淘汰南美勁旅哥倫比亞。事實上，美國搞運動的確有一手，經過多年投入大量資源發展足球後，依家無論大國腳抑或小國腳，都有力同世界列強周旋。就算美國U20最終奪得世青盃，亦唔會令人意外。
烏茲別克見底係咁先

塞爾維亞U20上仗千辛萬苦踢到補時逼和匈牙利1比1，先至有得打加時，晉級過程非常驚險，可見球隊實力好有限。同埋經過呢場惡鬥後，球員體力未曾恢復到，今仗唔好話贏，甚至要保持90分鐘不敗都有難度，試問點讓美國。

另一場烏茲別克U20對塞內加爾U20，烏茲別克入到8強只因對手較弱，唔好忘記佢哋分組賽只係靠贏魚腩斐濟晉級，16強擊敗平庸嘅奧地利所受考驗唔大，今仗對早熟嘅塞內加爾U20，係時候行人止步。