哥倫比亞強鋒摧「委」作客蟲

猪拉多纳

中場大把星 老虎勁Sharp醒

今晚美洲國家盃C組兩場戲碼，唔少人都聚焦喺巴西鬥秘魯上面，但其實哥倫比亞鬥委內瑞拉都勁有睇頭！法卡奧喺曼聯度過失意一季，但呢隻「老虎」返到國家隊就頻頻發威，今屆更被主帥柏加文委以重任，以哥倫比亞隊長身份領軍征戰美洲盃，首輪面對同組最弱嘅委內瑞拉，梗係要贏得好好睇睇啦，2.18倍「讓主」值得捧場！ （now681台周一凌晨3:00直播）

哥倫比亞近排狀態唔講得笑，出戰美洲盃前連贏7場熱身賽，斬獲17球僅失2球，無論攻守都勁有保證。箭頭法卡奧亦終於回復一級殺手本色，以入球報答主帥柏加文嘅信任，單係近3戰就斬獲咗4球，已經追平佢喺上季英超嘅總入球數字，明顯已經重拾昔日佳態！
委內瑞拉

離開高原唔識踢

咪忘記一點，就係哥倫比亞除咗「猛虎」，仲有好多極具質素嘅一流攻擊好手，好似法卡奧嘅鋒線拍檔卡路士巴卡咁，今季佢喺西維爾踢到曉飛，成為歐洲豪門搶購目標；中場更加唔使多介紹，有皇馬占士洛迪古斯、車仔古達度同維拉山齊士摩蘭奴鋪橋搭路，要撕破委內瑞拉防線，一啲難度都冇啦！

係，委內瑞拉雖然有經驗豐富嘅艾蘭高孭飛，但其他能夠喺歐洲主流聯賽搵食、而又站得住腳嘅國腳堅係少之又少，齋計牌面已經唔夠哥倫比亞揮。再講，委內瑞拉每逢離開高原主場就戰鬥力大減，近9次作客波贏得2場，對手仲要係實力麻麻嘅洪都拉斯、同埋搵二、三線兵應戰嘅秘魯，剩餘7戰唔單止全部輸晒，仲要每場最少失2球，今鋪點頂得住哥倫比亞強攻先？