玻利維亞變陣攞嚟衰 厄瓜多爾再歎私房菜

猪拉多纳

一向淨係識喺高原作惡嘅玻利維亞，上仗意外守和墨西哥拎番1分之後，主帥馬奧利斯奧蘇尼亞當堂勁囂張，揚言話會換人變陣再次製造驚喜喎。不過臨場變陣乃兵家大忌，佢哋聽朝喺A組鬥厄瓜多爾，想再創佳績邊有咁易，就算受讓半一都要唔過，撐厄瓜多爾1.75倍上盤。（now681台周二清晨5:00直播）

玻利維亞一向畀人印象係「高原球隊」，離開自己個主場就唔識作惡，所以佢哋上仗悶和墨西哥0:0的確係令人幾意外。但咪忘記墨西哥今屆並未以最強人腳參戰，射手查維亞靴南迪斯、卡路士韋拿、門將奧祖亞全部都冇份踢，戰果不足以作準喎。
近6次對賽

厄軍5勝1和

不過主帥馬奧利斯奧蘇尼亞似乎已經被1分沖昏頭腦，賽前突然High爆咁話，打算喺呢場波換過批正選落場搶分喎。眾所周知，踢大賽最忌係陣容朝令夕改，搞到班球員唔適應影響發揮，咁搞法，玻利維亞畀佢玩死都似囉！最重要一點，係厄瓜多爾近年食住玻軍，近6次交手錄得5勝1和，上次更作客大數玻利維亞4:0添。今次對住自亂陣腳嘅玻軍，係時候將對手打回原形啦！（美洲盃A組）