巴西哥倫比亞大有睇頭

猪拉多纳

全能殺手激鬥三叉戟

美洲國家盃明早上演C組「星戰」巴西大戰哥倫比亞，兩隊鋒線粒粒皆星，其中「森巴型男」尼馬上仗盡顯靈魂人物本色，一頂一傳助球隊旗開得勝，狀態弗到漏，等睇佢再數胡。哥倫比亞首仗意外全失3分，今仗更加要豁出去搶分，「三叉戟」法卡奧、卡路士巴卡、占士洛迪古斯始終有級數，有力攻陷巴西大門，首選入球大。（now681周四早上8時直播）
尼馬領軍森巴兵搶攻

巴西上仗補時驚險反勝秘魯2比1，確係有啲狼狽，不過亦反映呢支8屆美洲盃冠軍韌力十足，只要一踩油，就可以撕開對手防線。經過上仗教訓後，相信「森巴兵團」今場會先下手為強，開賽即採取主動，務求盡快取得領先優勢。

巴西隊長尼馬延續喺巴塞嘅勇態，首場即貢獻入波同助攻，盡顯能傳擅射嘅「全能殺手」本色，令對手後衞防不勝防。事實上，除尼馬外，「森巴兵團」其他中前場球員亦具備上乘破門技術，包括上仗後備上陣入波嘅杜格拉斯哥斯達。唔好忘記仲有上仗冇份踢嘅利物浦中場菲臘比古天奴，如果佢今仗披甲，勢必使出渾身解數以博取領隊鄧加歡心，爭取正選位置。預料巴西有力再下一城，奠定出線基礎。
哥國人腳鼎盛冇保留

至於哥倫比亞上仗意外0比1輸畀委內瑞拉，似有輕敵成分，結果依家逼到自己埋牆角，冇得再保留，即使對手係巴西，亦要焗攻搶分。哥國鋒線人腳鼎盛，就算法卡奧狀態麻麻，但仲有卡路士巴卡、占士洛迪古斯，前者喺今季西甲為西維爾轟入20粒，更喺歐霸盃決賽梅開二度，射術不亞於尼馬。

至於「J神」占士洛迪古斯亦則不時入靚波，又有遠射能力，肯定對巴西構成好大威脅。或者哥倫比亞未必贏到巴西，但起碼應該唔會再食白果，既然兩軍都有破門能力，一於玩「大」佢啦！