90後三叉戟喪攻 巴西要騷哥利

猪拉多纳

鄧加話明變陣搏殺

牡丹雖好都要綠葉扶持，尼馬單天保至尊唔係鋪鋪行得通，好在巴西領隊鄧加蠢唔晒，睇到迪亞高泰達利上場冇腳好波之後，據講佢會喺聽朝嘅C組次輪分組賽變陣出擊，搵羅拔圖法明奴同杜格拉斯哥斯達擔正幫輕吓「新比利」，有呢個「90後三叉戟」衝鋒陷陣，試問哥倫比亞點頂吖，捧「讓球主勝」啱數！（now681台周四早上8:00直播）

巴西首戰靠尼馬一傳一射險勝秘魯，過程一啲都唔輕鬆，當中効力FC山東嘅前鋒迪亞高泰達利，喺呢場波嘅廢爆演出飽受批評，反而杜格拉斯哥斯達同羅拔圖法明奴後備入替之後，成班「森巴兵」即時生猛晒，就連主帥鄧加都漏口風，預告會變陣鬥哥倫比亞：「我好着重整體表現，唔同球員會對成隊波產生唔同嘅化學作用，嚟緊正選肯定會有變動。」
哥倫比亞嚴重走樣

杜格拉斯哥斯達出道嗰時有「新細哨」之美譽，適逢菲臘比古天奴因傷大有機會缺陣，巴西極需要杜格拉斯哥斯達呢類創造型中場派牌；至於盛傳即將過檔曼聯嘅羅拔圖法明奴，盤、傳、扭、射瓣瓣掂，有佢兩個拍住尼馬合組攻擊鐵三角，哥倫比亞後防畀人轟到甩皮甩骨都似。

查實今場唔睇好哥倫比亞，主因係佢哋今屆賽事嚴重走樣，首戰倒灶輸畀委內瑞拉場波完全唔對辦，隊長法卡奧狀態持續低迷，踢足全場得1次射門仲要唔中框，32次觸球次數係全隊第2少，僅次前線拍檔卡路士巴卡，亦即係話中前場對住委內瑞拉都斷晒纜，想喺巴西後防搵着數？難啲喎，唔畀人炒鑊勁都偷笑啦！