塞內加爾馬里大鬥法

猪拉多纳

世青盃季軍戰聽朝會喺新西蘭嘅奧克蘭上演「非洲打吡」，由塞內加爾U20對馬里U20。兩軍喺準決賽都係喺打少一個人嘅情況下落敗，今場季軍戰喺冇壓力加上有主力停賽之下，隨時會踢得非常開放，阿謙睇好今仗兩隊入得又失得，一於捧大盤。（周六早上9時30分開賽）

塞內加爾U20喺準決賽面對巴西U20顯得毫無還擊之力，慘遭「小森巴兵」以5比0蹂躪，更有守將艾利馬尼施斯領紅牌今仗要停賽，對球隊實力始終會有影響。上仗大敗嘅塞內加爾U20自然希望贏出季軍戰令球迷重拾信心，主帥約瑟夫高圖今仗將續以迪安前鋒泰安掛帥，呢位箭頭喺8強對烏茲別克U20曾經一箭定江山助球隊贏波，今仗面對馬里U20相信有望取得入球。
冇嘢保留料演入球騷

馬里U20喺準決賽同塞爾維亞U20激戰百二分鐘輸1比2，球隊表現已盡所能，但踢緊里爾嘅後衞尤素夫干尼因推撞球證而被罰停賽，對球隊實力相信有所影響。由於踢緊比甲韋斯達路嘅前鋒迪亞路仲未好番，令馬里U20陣中可供調動嘅歐洲外流球員買少見少，得番里爾前鋒艾達查奧爾、中場哥巴基、拉瓦勒前鋒高拿迪及蘭斯中場科斯尼迪亞比堤能夠候命，但球隊嚟到季軍戰都冇嘢好保留，相信會精銳盡出力爭勝利，今仗隨時上演入球騷，阿謙推介大盤。