巴西U20半和有數維

猪拉多纳

爭霸戰守字行先

世青盃終極戰開打！巴西U20同塞爾維亞U20喺今日晏晝於新西蘭進行王者對決，力爭冠軍寶座。雖然話巴西奪冠經驗豐富，上仗更以5:0炒起塞內加爾U20晉級，不過嚟到最後關頭，相信一眾森巴小將都唔會盲目搶攻，對住同樣擅守嘅塞爾維亞U20，相信半場冇咁易分出勝負，留番下半場先駁火，1.9倍半場和咪走寶。（開賽時間：周六下午1:00）

曾經攞過5屆世青盃冠軍嘅巴西U20，只要呢鋪成功登頂，即可追平阿根廷，齊齊以6次捧盃成為世青盃冠軍霸主。嚟到呢個重要時刻，一眾「小森巴兵」肯定加倍小心，以免蝦碌出事，功虧一簣。
巴西前鋒表現不穩

事實上，巴西領隊米卡利非常重視防守，由頭兩場失3球，到近4場冇失波，防線表現有改善。雖然佢哋上仗大勝對手入決賽，不過班波喺16強同8強前線啞火，要靠贏12碼先晉級，火力咁唔穩定，半場未必有貨交。

另邊廂，今次喺塞爾維亞獨立後首次參戰世青盃，梗係想贏波創造歷史啦！塞爾維亞U20同樣以硬淨爛打見稱，佢哋喺今屆6戰賽事開出4次半場和，僅得上仗4強鬥馬里U20先喺換邊前失守，可想而知班波集中力極高。
塞爾維亞留前鬥後

仲有，塞爾維亞主帥柏奴域賽前放風擔心球員體能唔足以全場踢出高水準足球，擺明唔會搏足90分鐘，暗示上半場玩龜縮未定，留番下半場先嚟料同巴西博過，兩軍都咁保守，半場和開出唔奇喎。