飛腳仙台「大」騷娛賓

猪拉多纳

只要浦和紅鑽今日作客打和或者贏到神戶勝利船，就會攞到日職首階段冠軍，所以大阪飛腳對仙台維加泰其實冇乜實質意義，博1.75倍入球大可能穩陣過飛腳2.2倍「讓球主勝」。（有線64、203周六下午3:00直播）

由於日職首階段只剩兩輪，浦和賽前咧住少踢一場嘅飛腳9分，今日和波都提前封王，飛腳除咗希望贏到仙台，縮窄同浦和嘅分差，真係冇乜好諗，事實全季總分冠軍呢件事太遙遠喇，今日失分都唔代表佢哋日後追唔到，於是乎呢場波存在好大變數。

從往績去睇，飛腳又真係冇乜把握話o趙梗仙台，上季雙方連日聯盃3次對戰，仙台居然1勝2和未輸過，可以話係飛腳差啲攞唔到聯賽冠軍嘅絆腳石，而且佢哋史上响萬博主場4戰仙台，都係得1勝3和，完全冇優勢可言。
仙台遇強隊多波入

相比之下，入球大比較值博，首先係仙台今季對強隊都特別醒神，4:4和過浦和，對FC東京、川崎前鋒都係僅負2:3，上星期更加突然嚟料，5球炒爆咗鳥棲砂岩，即使後衞石川直樹腰傷唔出得，但係上本大海、鎌田次郎兩件養咗傷一排嘅守將，同埋前鋒奧埜博亮都會復出，陣容極之完整，夠本錢同飛腳搏錘。
飛腳17歲新星

擔正爭創士哥紀錄

飛腳雖然冇乜往績優勢，不過佢哋嘅平均質素高啲，今日取代傷兵內田達也擔正嘅中場小將堂安律，如果入到波嘅話，仲會以17歲零4日之齡，成為飛腳史上最年輕入球球員，只係輸畀稻本潤一個日職最年輕入波紀錄3日，連飛腳主帥長谷川健太都期待佢同宇佐美貴史、安達臣柏德列產生到化學作用，今日可能有貢獻都未定。