J神孭到飛撐哥倫比亞

猪拉多纳

較早時間開波嘅另一場C組尾輪賽事，由哥倫比亞硬撼秘魯，由於呢組4隊同分情況複雜，乜嘢事情都可能發生，哥倫比亞雖然排緊包尾，但只要今仗贏波就肯定出線，「J神」占士洛迪古斯更獲哥國名宿艾斯派拿大讚，喺關鍵時刻梗係要騷吓哥利喇，就算讓球盤要讓一球，照撐哥倫比亞上盤。（now 681周一凌晨3時直播）
名宿艾斯派拿大讚

為咗公平起見，好多國際大賽分組賽尾輪同時間舉行，不過美洲盃偏偏反其道而行，尾輪照安排喺唔同時間進行，對踢早場嗰兩隊都幾蝕底。尤其係C組4隊巴西、委內瑞拉、秘魯同哥倫比亞同得3分，邊隊晉級邊隊出局都未知，因此與尾場巴西對委內瑞拉可睇定形勢嚟踢相比，今仗哥倫比亞同秘魯都冇得保留。

哥倫比亞首仗大意不敵委內瑞拉，好彩上仗及時回勇贏巴西，結束24年不勝「森巴兵團」嘅陰霾，士氣大振。雖然中場核心「J神」占士洛迪古斯今屆仲未開齋，但哥國名宿艾斯派拿讚到呢位後輩天上有地上無，尤其係罰球造詣勁過美斯同C朗，現時隊長法卡奧狀態跌晒Watt，另一前鋒卡路士巴卡今仗要停賽，哥倫比亞前線靠晒「J神」發威。
秘魯法芬上陣成疑

秘魯上仗大部分時間打多個下，僅憑老將比沙路一箭定江山險勝委內瑞拉，贏得冇乜說服力，而且翼鋒法芬因藥物敏感，今仗上陣成疑，攻力進一步受削，加上近10次碰頭未試過喺法定時間之內擊敗對手，擺明畀人食住。以波論波，逐漸上力嘅哥倫比亞更勝一籌，加上贏波便進身8強，肯定能激起佢哋戰意，讓球盤哥軍要讓一球，乃坐走望贏格局，斯維強捧上盤。