捷克砌德國大晒冷

猪拉多纳

東道主爭出線硬碰硬

今晚上演U21歐洲國家盃A組最後一輪比賽，東道主捷克U21迎戰德國U21，爭出線形勢緊湊，4隊都有機會晉級。捷克身為主辦國冇理由分組賽出局咁失禮，即使遇上勁旅，亦要焗攻搶3分。德國青訓出色，擁有多位喺德甲及英超搵食嘅球員，賀芬咸射手禾蘭上仗梅開二度，為保出線席位，勢同主隊駁火，首選入球大。（周三凌晨2時45分開賽）

捷克揭幕戰領先下，大意畀丹麥反勝2比1，球隊痛定思痛，上仗即大炒塞爾維亞4蛋，中場基文特大演帽子戲法。呢支東歐球隊部分主力已屬於大國腳，包括車路士守將卡拿斯，布拉格斯巴達射手華拉夫卡特歷，只要一踩油，足以衝散任何對手防線。捷克因對賽成績不及同得3分嘅丹麥，出線形勢被動，如果今場失分，隨時出局，應會採取主動求勝。

至於榜首德國U21領先丹麥同捷克1分，今場和波都可以出線。不過「日耳曼兵團」傳統上注重進攻，無論大小國腳都一樣，今次大軍不乏擅射之人，禾蘭上季德甲轟入8球，成為賀芬咸首席射手，佢上仗入兩球，盡顯功架。領隊賀巴殊仲召入利物浦守將安利簡恩，出任最擅長嘅中場位置，令德國組織力更強。德國輸波都有可能出局，所以唔可以主守，否則一旦失守，隨時冇仇報。既然球隊中場前人才濟濟，應會先下手為強。
丹麥塞爾維亞生死戰

同時間開波另一場丹麥U21對塞爾維亞U21，丹麥和波都有出局危機，塞軍更加必須贏波，先至有望出線，預料雙方都會豁出去放手一搏，同樣要入球大。