智利不勝無「圭」

猪拉多纳

維達爾A山槍槍攞命

今屆美洲國家盃表現堅Sharp醒嘅東道主智利，明早嘅8強戰將會坐鎮首都聖地亞哥火併衞冕嘅烏拉圭，智利幾大槍手阿歷斯山齊士、維達爾、伊度亞度華加斯、艾蘭古斯輪流發炮，成為分組賽火力最猛球隊，依家幾大射手個個都咁弗，真係槍槍都攞你命；相反烏拉圭主力射手卡雲尼3戰食白果，靠呢位永遠孭唔到飛嘅敗家仔蛇都死，簡單捧火力全開嘅智利1.67倍主W。(now 681周四早上7時30分直播）
分組賽3戰轟10粒

雖然智利從未捧過美洲盃（連南美國家盃在內），但卻係近年冒升得最快嘅南美球隊之一，連續兩屆世盃殺入16強有辦你睇，而以阿歷斯山齊士（A山）為首嘅主力，經過多年喺歐洲搵食後日漸成熟，今屆主辦美洲盃，無論球員定粉絲都以奪冠為目標。除咗於A組兩勝一和首名出線外，陣中幾大槍手阿歷斯山齊士、維達爾、伊度亞度華加斯同艾蘭古斯輪流數胡，3戰共轟入10粒，成為分組賽入球之冠，展現霸氣絕對唔講得笑，其中悍將維達爾並冇受醉駕炒車之事困擾，暫以3球位居射手榜首，心理質素之強值得畀個Like佢，另外A山亦愈踢愈好，加上喺主場球迷面前唔衰得，故預咗會主動搶攻，務求以漂亮勝仗晉級。
烏拉圭勢弱唔夠揪

另一邊廂，上屆美洲盃憑三叉戟科蘭、蘇亞雷斯同卡雲尼封王嘅烏拉圭，狀態每況愈下，喺前者退役同「咬人蘇」被罰坐波監情況下，烏拉圭惟有靠卡雲尼單天保至尊，可惜呢位ＰＳＧ中鋒冇個大佬傍住永遠擔唔到大旗，踢咗3場分組賽仲未開齋，令球隊被迫打守勢波變咗縮頭「烏圭」，堂堂上屆盟主3場入得嗰兩粒真係堅羞家。

儘管今仗有中堅高甸刑滿復出，但輪到左閘艾華路佩雷拉停賽，預計烏拉圭希望同智利鬥磨玩拉布，只係智利火力實在太勁，攻擊點又多非常難防，烏拉圭勢難頂得住狂轟猛炸，斯維認為智利可喺法定時間內擊敗「烏圭」晉級4強，主W有1.67倍，宜趁早入貨。