阿根廷玩殘穿窿哥倫比亞

猪拉多纳

美斯打病虎

「武松打虎」相信大家都由細聽到大，咁「美斯打虎」你又睇過未？一心諗住將美洲盃冠軍帶返阿根廷嘅美斯，聽朝將會喺8強戰，迎戰由「老虎」法卡奧帶領嘅哥倫比亞。之但係法卡奧今年急速退化做「病虎」，加上班波今仗中門大開，仲邊有條件做攔路虎先？1.73倍主勝咪走寶！（now681台周六早上7:30直播）

哥倫比亞老虎法卡奧早年曾威震西甲，強如美斯、C朗想收拾佢都唔係咁容易。可惜呢隻猛虎今年大跌Watt，成季幫曼聯入得4粒咁大把，以為佢返到國家隊會翻生？結果淨係識喺熱身賽士哥，但一去到美洲盃就再次打回原形做番病虎，分組賽3戰全部食白果，直接令球隊前線死火，總計哥軍今屆入球數字只係叻過魚腩部隊牙買加，呢次對住地上最強嘅美斯仲點發惡先？
法卡奧 占士死火

中場屏障冇埋

老虎唔識作惡，其他隊友又點呢？主將占士洛迪古斯同樣啞火，開戰至今1個入波或者助攻都冇交過出嚟。至於前鋒卡路士巴卡早前因為推撞尼馬繼續坐波監，另一射手積臣馬天尼斯仲衰，最近忙住搞轉會加盟馬體會，咁你話佢仲點會專心備戰吖？

雪上加霜嘅係，哥倫比亞今仗連一對中場屏障都冇埋，中場山齊士摩蘭奴停賽，另一防中艾雲華倫西亞上仗勇戰受傷，賽後驗出佢至少要長抖半年。換言之球隊今仗焗住由級數一般嘅蒙特雷中場阿歷山大美查、艾雲卡東拿頂上，好易出事喎，容乜易畀美斯長驅直進，直搗黃龍。
阿根廷愈踢愈對辦

另邊廂阿根廷自從首戰大意被巴拉圭追和後，班波吸取教訓後再冇犯錯失守，表現對辦。況且主將美斯啱啱升呢做百夫長、又過埋28歲生日，梗係想做番齣好戲賀一賀。加上上仗休息嘅射手阿古路、中堅奧達文迪重任正選，齊晒腳開路兼穩住大後方，實行等美斯專心打走呢隻攔路虎殺入4強。