東京盡炒歡送萬人迷

猪拉多纳

武藤嘉紀告別戰

武藤嘉紀赴德前最後一擊，FC東京响呢個「送別大會」點敢唔去盡吖，一於博佢哋主場掃低清水心跳，為武藤嘅日職生涯畫上一個階段性完美句號，玩2.7倍「讓球主勝」啦！（有線61、201周六晚6:00直播）
主場4萬波飛售罄

武藤呢個新日職萬人迷打埋今場波，就會正式轉投德甲緬恩斯，所以FC東京啲擁躉連日嚟去小平訓練基地捕佢，尋日武藤仲親自同500個粉絲逐一握手道別，睇見班Fans咁依依不捨，佢都話感動到想喊。事實呢場波已經成為東京球迷嘅焦點，味之素球場42,000張飛全部售罄，個個都係為咗睇武藤光榮告別，呢種氣氛已經對東京班球員形成好大推動力，後衞森重真人都話在公在私都要幫武藤贏波。
清水攻守主將倦勤

其實對家清水心跳作客東京嘅往績唔算輸蝕，22戰攞到8勝4和10負，頂龍只係四六波，但係佢哋件澳洲國腳米歇爾杜基坐波監，左路攻擊一定打折扣，後衞平岡康裕仲要撞爆咗左邊面骨，需要休息個半月，一前一後打少兩件。雖則話內田健太復出，佢可以由後防推前踢左中場，不過呢位仁兄已經坐冷板坐咗2年零4個月，硬晒軚有乜出奇？清水响首階段壓軸戰想唔輸，真係相當有難度。