撐德女「晉級」決賽

猪拉多纳

活力火力贏晒花旗老兵

加拿大女子世界盃，4強大戰美國女足對德國女足，兩大熱門對撼，變相「提前決賽」！上屆亞軍「美女」已成明日黃花，全隊平均年齡達29歲零5個月，屬於最大年紀球隊，晉級過程甚艱辛。反觀，「德女」已完成換班，兩位射手莎絲、美泰格今屆共轟入11球，銳不可當。若然最終需要加時，相信較年輕嘅「德女」體力佔優，一於捧德國女足「晉級」決賽。（中央5台周三早上7時直播）

一向以攻力強橫見稱嘅美國女足，今屆顯得暮氣沉沉，5場比賽未試過淨贏多過兩球，8強對以小將為主嘅中國女足，亦攞唔到甜頭，僅小勝1比0。美國傳媒都睇唔過眼，直斥呢支「美女」同99年捧盃嗰隊，相差得太遠。事實上，美國女足仍然依賴一班老將打江山，上仗入波功臣萊德32歲，隊長雲芭芝更加已經35歲，對哥倫比亞一戰仲射失12碼，顯得力不從心。經過連場緊密大戰後，「美女」體力更加輸蝕。

03及07年冠軍德國女足上屆因青黃不接，搞到8強止步，經過4年改革，今屆重拾霸氣，5戰入20球。其中27歲嘅莎絲今屆世盃已有6球進帳，位居射手榜第1位。至於有份為德國奪得07年世盃冠軍嘅美泰格，今屆孭重飛，轟入5球，兩位當勇射手拍住上，「美女」好難招架得住。
德軍射12碼都靠得住

值得一提，德國球員心理質素好，無論男女足，射12碼都好有把握，佢哋上仗靠互射12碼淘汰法國。如果今場又要互射12碼，「德女」可以秤先，投X「晉級」比較划算。