紐約打吡等睇入球騷

猪拉多纳

紅牛宇宙仇人見面有火

美職聯賽盃16強明早餘下4場賽事，最矚目肯定係紅牛主場對宇宙嘅「紐約打吡」。宇宙上圈面對另一支同市球隊紐約城都踢得飛沙劈石，今仗遇上紅牛相信都唔會踢得保守。宇宙上年喺美聯盃主場曾經以3比0輕取紅牛，紅牛今仗抱住復仇心態肯定會踢得進取，阿King相信今場「紐約打吡」入波唔會少，捧大盤！（周四早上7時30分開賽）

紅牛目前喺美職東岸排第4，最近4仗贏咗3場狀態幾好，包括日前對紐約城嘅打吡戰以3比1擊敗對手。值得留意係近期入球率甚高，最近6場賽事無論贏輸都唔會空手而回，當中前鋒巴利胡禮菲臘斯上仗取得入球，成功走出早前對白帽兩度射失12碼嘅陰霾，配合另外兩位前鋒安拿度利艾班同米克格拿，今仗絕對有力攞到入球。

宇宙陣中最受注目嘅肯定係踢過皇家馬德里嘅射手魯爾，呢位前皇馬隊長雖然年近40，但作為球會嘅icon人物，落親場都交足功課。同時，另一位踢過西甲維拉利爾嘅中場辛拿，此子名氣不及魯爾，不過早前宣布踢埋今季賽事就會掛靴，雖然佢最近幾場都冇上陣，但一眾隊友自然會搏命爭勝，希望能夠以美聯盃冠軍作為辛拿退役前嘅禮物。
兩軍踢打吡無大不歡

紅牛同宇宙上季曾經喺美聯盃第4圈交手，當時有主場之利嘅宇宙以3比0輕取對手。兩軍今仗再次碰頭，紅牛當然矢志報回去季一敗之辱，但宇宙自6月18日踢完上輪美聯盃賽事後就一直未有比賽，以逸待勞下相信有力同紅牛周旋到底，加上兩隊今季踢親「紐約打吡」都開出大盤，阿King有信心今仗入波唔會少，一於捧大盤。