日本女足衞冕搏殺「格」

猪拉多纳

4強激戰前獎金加碼

女子世盃4強大戰繼續上演，日本女足聽朝對英格蘭女足，讓平半追得過。雖然日本女足連續5場煲魚生粥贏波冇乜霸氣，但日本足協知道唔對路，已經講明會為冠軍獎金「緊急增額」，英格蘭女足後防唔掂咪高估。（中央5台周四早上7:00直播）
日本連續5場贏1粒

衞冕冠軍嘅日本女足喺8強以1:0淘汰澳洲女足，史上首次有球隊喺女子世盃連續5場僅勝1球，而且作為上屆最佳球員嘅36歲中場澤穗希，已經連續兩場要做後備，球迷當然擔心啦！正因為咁，日本足協即刻出招振奮士氣，保證冠軍獎金肯定比上屆嘅每人150萬日圓（約9.5萬港元）豐富得多，激勵球員搏命再入決賽。
英格蘭妹場場有失波

另一方面，英格蘭女足喺8強以2:1擊敗東道主加拿大女足，首次殺入4強，而且英國皇室成員威廉王子，都專程睇佢哋操練探班，講士氣肯定冇得頂。但唔好忘記，其實英格蘭女足已經連續5場失守，去到淘汰賽好牙煙，尤其是門將卡倫芭斯莉上場波撞傷右眼附近位置傷出，就算今場踢得，睇怕都會繼續失波。