利斯菲無敵主場 搵國體會雪恥

猪拉多纳

要數今季巴甲驚喜球隊，點少得排緊榜首嘅利斯菲體育會，佢哋上季明明以中游衝線，點知今季一開閘極速跑出。家陣班波士氣high到爆，聽朝喺自己個無敵主場出戰國際體育會，梗係想洗刷近年贏唔到對方嘅恥辱，利斯菲呢次小讓平半，1.9倍上盤值得捧場。（開賽時間：周四早上6:30）

利斯菲今季表現咁醒，頭號功臣非主帥伊度亞度巴迪斯達莫屬，呢位主帥對旗下球員一視同仁，唔會特別關照某位主力，踢法亦以整體為主，至今已經有10個球員開咗齋，火力點分散令人防不勝防。呢支巴甲唯一一支不敗之師喺主場踢波就更加惡，5戰全勝兼攻入10球，呢鋪再喺主場出擊，係時候砌低對手抹去連續6次對戰不勝污名！
國體會作客腳軟

對手國際體育會今季演出中規中矩，暫以3勝4和2負成績排第10名，但要留意呢班波主要靠地頭搶分，一到客場作戰隨即腳軟，只得3和2負羞家戰績。況且班波目前只有4個球員入過波，支援睇落唔多夠，加埋後衞阿倫路舒曹、門將迪達缺陣，攻不銳守不穩好難搶分啫。