智利 阿根廷爭做南美盟主

猪拉多纳

美洲國家盃周日凌晨爆發王者之戰，東道主智利將喺首都聖地亞哥迎戰阿根廷。智利從未贏過美洲盃，今次當然想喺國民面前寫下歷史新一頁，可惜智利過去4次身為主辦國都係睇住今場對手阿根廷捧盃，加上「無冕球王」美斯及隱藏殺手希古恩近年專剋智利，在「福地」及「福星」互相拱照下，阿根廷可望一搔22年之癢，再次揚威美洲盃！（now681台周日凌晨4:00直播）

貴為3屆國際足協金球獎得主，阿根廷前鋒美斯只係拎過世青盃冠軍及奧運金牌，從未代表大國腳贏過任何大賽，故此經常被謔為「無冕球王」，不過今次終極一戰可以講係美斯一洗污名嘅好時機。首先，智利之前6次主辦美洲國家盃（連前身南美國家盃），除頭兩次（1920、1926）冠軍為烏拉圭，過去4次（1941、1945、1955、1991）不約而同都係由阿根廷封王，對阿根廷嚟講簡直係福地！
福地出擊專剋東道主

其次，阿根廷近10次國際賽對智利取得6勝3和1負壓倒性優勢。阿根廷上場準決賽大勝巴拉圭6:1，美斯冇波入但交出3個助攻，演出夠卡士。希古恩今屆雖然屈居阿古路之後擔任次選前鋒，但每次落場都交足功課，上場後備上陣僅兩分鐘便射入埋齋一球，表現可人，兩大剋星勢成今場爭標最重要棋子。

自從美洲盃於93年改制、將參賽球隊增至12隊，今次只係智利首次進身決賽，比起於此段期間3次打入決賽嘅阿根廷，經驗自然輸一截。

阿根廷對上兩次決賽落敗對手同樣係巴西，今次宿敵早早喺8強出局，似乎已為阿根廷清除捧盃最大障礙。阿根廷贏埋今屆便可以15次追平烏拉圭成為捧盃次數最多嘅球隊，無論對美斯個人或國家隊嚟講都分外有意義。