秘魯贏經驗季軍戰搶尾彩

猪拉多纳

周六早上舉行嘅季軍戰會由秘魯鬥巴拉圭，今次係秘魯連續兩屆亮相季軍戰，上屆佢哋大勝委內瑞拉攞尾彩，今屆遇上剛喺準決賽大敗畀阿根廷嘅巴拉圭，相信秘魯可以再下一城。（now681台周六早上7:30直播）

秘魯及巴拉圭近年喺國際賽交手成績非常接近，過去10次碰頭，秘魯取得3勝2和5負。如果只計美洲國家盃，兩軍對上一次碰頭係2001年，當時兩隊於分組賽打和3:3。

自從美洲盃93年改制後，今次係秘魯第3次出戰季軍戰，之前兩次先係97年以0:1輸畀墨西哥，然後就係上屆以4:1擊敗委內瑞拉，喺該仗有份上陣嘅射手荷西古里路、中場盧巴頓、後衞基斯甸拉莫斯及約斯馬約頓現時仍在陣中，似乎較能迅速由4強落敗中復甦。
巴拉圭踢淘汰賽0勝率

巴拉圭應付季軍戰經驗較少，而且佢哋上場4強戰以1:6畀阿根廷大炒，球員能否及時調整及重建信心頓成疑問。巴拉圭今屆喺8強只憑互射12碼淘汰巴西，上屆8強至決賽嘅3場淘汰賽亦未試過喺法定時間之內贏波，加埋再前兩屆8強出局，巴拉圭近4屆出戰淘汰賽嘅勝出比率為0%，今仗自然被睇低一線。