花旗兵弗爆玩殘危地馬拉

猪拉多纳

美洲金盃將會喺下個禮拜三揭幕，貴為今屆捧盃大熱門嘅美國冇放過任何備戰機會，聽朝喺主場同危地馬拉踢埋最後一場熱身賽。以「花旗國」最近連贏德國、荷蘭嘅氣勢，有力大數對手振軍心，1.63倍「讓主」唔好錯過。（開賽時間：周六早上6:30）
連續13仗有波入

今屆金盃由美國同加拿大聯合主辦，勁多美國球迷都寄望國家隊成功衞冕，單係呢場熱身賽就賣出超過3.3萬張波飛，有望打破田納西州入場支持國家隊嘅入座紀錄，一眾「花旗兵」點都要做番出好戲嚟答謝鄉親父老支持。事實上美國最近勇不可擋，連續13仗有波入之餘，更先後反勝荷蘭同德國，班波咁Fit，試問危地馬拉邊頂得住先？

何況危地馬拉連續20次鬥美國都唔識贏，家陣佢哋只得6位球員夠料出國搵食，前線仲依賴35歲老牌射手卡路士雷斯攻堅，實力未有太大提升。加上球隊早前連鬥墨西哥、烏拉圭至少輸3粒，呢鋪對住氣勢如虹嘅美國輸多鑊甘都唔奇。