松鼠不敗斷纜搵成功丸出氣

猪拉多纳

今日下晝日乙有多場賽事上演，其中阿King睇中大宮松鼠作客長崎成功丸呢場波。松鼠連贏5場及不敗身嘅氣勢上仗雖被打斷，但實力始終有番咁上下，今仗造訪近5仗未贏過兼零入球嘅成功丸，相信有望重拾勝軌，松鼠小讓平半阿King捧上盤。（周六下午5時開賽）

現時排榜首嘅大宮松鼠上仗主場畀東京綠茵終止12場不敗身，但阿King就覺得呢場波輸得合時，因為呢個不敗紀錄令松鼠球員甚有壓力，輸波可以話係幫球員減壓，今仗有望踢番水準。松鼠呢場波有中場金澤慎因傷上陣成疑，後衞今井智基離隊轉投柏雷素爾，但最近重當正選嘅前鋒美迪查狀態唔錯，有望取得入球。

長崎成功丸自5月尾後表現跌Watt，近5仗未贏過只錄得2和3負劣績。最慘係佢哋呢5場波都入唔到，今場更有後衞刀根亮輔因傷難以候命，面對一心重踏勝軌嘅松鼠，主場出擊難有作為，作客嘅松鼠小讓平半，阿King全力撐上盤。
薩維根綠茵拍住搶W

排第3嘅金澤薩維根作客北九州向日葵，向日葵有中場加藤弘堅停賽，戰力大減下難望有好成績，要客Ｗ。最後東京綠茵上仗爆冷贏松鼠，雖然中場般奴高天奴同後衞高木大輔未能復出，但對手福岡黃蜂近期走勢麻麻，而且剛加盟嘅前巴甲邦迪比達射手威靈頓路爾斯狀態未起，東京綠茵主勝好路。