德女季軍戰獵英攞彩

猪拉多纳

前鋒雙嬌搶胡爭金靴

女子世界盃季軍戰，德國女足對英格蘭女足，原本奪標大熱德國女足上仗因前鋒莎絲射失12碼，錯過領先機會之餘，最後仲輸埋畀美國。呢位今屆已有6球進帳嘅射手，今仗當然要將功補過，為「德女」攞番個尾彩，自己亦要爭神射手獎，必定搏命。英格蘭女足4強補時輸烏龍波出局，士氣大受打擊，恐怕再谷唔起。德國女足讓一球，都要上盤。（中央5台周日凌晨4時直播）

德國女足今屆賽事一路表現好好，尤其係一對前鋒莎絲同美泰格狀態大勇，分別入咗6球同5球。不過偏偏4強對住另一熱門美國，莎絲竟然射失12碼，轉個頭球隊就失波，成為整場比賽轉捩點。莎絲由英雄變罪人，梗係唔好受，所以今場更加要盡力數胡，為「德女」省番靚金漆招牌，同時為自己爭神射手獎。唔好忘記，佢嘅拍檔美泰格亦有機會超前莎絲，奪取神射手獎，兩女鬥射術，英格蘭女足防線有難。
英女4強被絕殺洩晒氣

英格蘭女足今屆歷史性入到4強，已算超額完成。可惜球隊上仗補時階段因為芭絲迪擺咗個世紀烏龍，畀日本絕殺，輸得好唔抵，球員完場都痛哭落淚，恐怕心情難以平復。事實上「英女」能夠創出佳績都係靠一股拚勁，但依家已經洩晒氣，情況令人擔心，加上門神卡倫芭斯莉有傷在身今場或會缺陣，睇怕抵擋唔住實力較高嘅德國女足強攻猛打。